2018an abiatu zuen Galtzagorri elkarteak Eusko Jaurlaritzako Kultura Sailarekin lankidetzan “Irakurketaren bitartekarientzako lantegiak” izeneko egitasmoa. Honen azken xedea da haur eta gazteen (2 urtetik 16 urtera) irakurtzeko zaletasuna sustatu eta literatura heziketa areagotzea. Horretarako, haur eta gazteen eta liburuen artean zubi-lana egiten duten bitartekarien literatura prestakuntzan sakondu nahi dugu. Bitartekarientzako lantegiak egitasmoak bigarren helburu bat ere badu: herri bakoitzeko irakurketaren bitartekarien artean sarea ehuntzea, herri liburutegietan eta eskola-liburutegien inguruan lan egiten dutenen arteko sarea, hain zuzen.

Egitasmoaren mamia herriz herri Galtzagorriko adituek bitartekariei eskaintzen dizkieten saio praktikoek osatzen dute. Liburu berri eta aukeratutakoen bilduma aurkezten zaie bitartekariei, baita bakoitzarekin haur eta gaztetxoen irakurketa ohituraren sustapenerako erabili ditzaketen estrategiak eta tresnak azaldu ere.

Saioek bi ordu inguru irauten dute eta hezkuntza zentroetako eskola-liburutegietan (halakorik dutenetan) egiten dira. Gehienez zentro bakoitzeko 30 profesionalek hartu dezakete parte (gutxieneko kopurua 3 da). Ezinbestekotzat jotzen dugu eskola-liburutegiaz arduratzen den bitartekariak zein zuzendaritza taldeko ordezkari batek parte hartzea. Herri bibliotekariak gonbidatzen ditugu baita ere saio hauetara.

Guztira, zortzi urte hauetan 602 lantegi eskaini dizkiegu 12.000 irakasle baino gehiagori eta 100 bat udal bibliotekariri. Bitartekari askoren motibazioa areagotu eta haien literatura prestakuntzan sakondu dugu. EAEko 301.775 haur eta gazterengan eragin dugu bitartekari horien bidez.

2026an ere “Irakurketaren bitartekarientzako lantegiak” egingo ditugu. Eusko Jaurlaritzako Kultura Ondarearen, Jabetza Intelektualaren eta Lege Gordailuaren Zuzendaritzako Liburutegi Zerbitzuaren babesarekin, 72 lantegi eskainiko ditugu, herriz herri, EAE osoan. Gainera, udal liburuzainei berariaz hiru saio eskainiko dizkiegu aurten lehen aldiz. Horretarako, probintzia bakoitzeko herri-liburutegi bat aukeratu eta gainerako liburuzainak gonbidatuko ditugu bertaratzera.