Bilbon jaioa. HGLren alorreko ikertzaile, irakasle, idazle eta itzultzailea da. UPV/EHUko irakasle titularra da Hezkuntza eta Kirol Fakultatean, eta Haur eta gazte literatura eta Literatura itzulia ikertu ditu batez ere. Horren emaitza dira, besteak beste, Euskarara itzulitako haur eta gazte literatura (2000), Autoitzulpengintza euskal haur eta gazte literaturan (2005), Literaturak umeei begiratu zienean (2006), 90eko hamarkadako haur eta gazte literatura (2005) eta XXI. mende hasierako haur eta gazte literatura (2011), azken biak Xabier Etxanizekin batera. Galtzagorrik 2004an argitaratutako Panorama de la literatura infantil y juvenil vasca actual obraren editorea izan zen, eta Behinola aldizkariaren sortzaileetariko bat eta lehen koordinatzailea.

Idazle bezala, Jaun agurgarria (1993), Urrutiko intxaurrak (1995), Gogoa lege (2005) eta Paperezko bizitzak (2011) eman ditu argitara, beste batzuen artean.

Itzultzaile gisa, Lewis Carroll-en obren euskaratzailea da: Alizia herrialde miresgarrian (2015), Alizia haurrentzat (2004) eta Ispiluan barrena (1990).

* Segurtasun arrazoiak direla medio, profesional honen datu pertsonalik ez duzu aurkituko web gune honetan. Hala ere, horiek eskuratu nahiko bazenitu Galtzagorrira dei dezakezu (Telf: 943471487) edota email bat igorri (galtzagorri@galtzagorri.eus) eta ahal dugun guztian lagunduko dizugu.