Izenburua: Sirena esnatu zenean
Idazlea: Sébastien Perez
Ilustratzailea: Justine Brax
Itzultzailea: Patxi Zubizarreta Dorronsoro
Argitaletxea: Ibaizabal
Urtea: 2024
Orri kopurua: 40
Adina: 8tik gora
Laburpena:
Tamaina handiko album ilustratu honek sirenen eta gizakien arteko harreman gatazkatsua du ardatz, elkarbizitzaren eta iraganaren zamaren inguruko gogoeta eginez. Gertakariak dramatismoz eta tonu epikoan kontatzen dira, itsas hondo ilunetan hasi eta gizakiaren mundura irekitzen den istorio batean. Sirenak, aspaldiko gertaera bortitz baten ondorioz erretiraturik bizi dira, baina Aelys izeneko sirenak gizakiekiko jakin-mina adierazten du. Erabaki horrek ondorio larriak ekarriko ditu eta, haiekin izandako lehen harremanaren ondoren, Aelysek bere iragana sinbolikoki moztea erabakitzen du.
Narrazioa ilustrazio handiz lagunduta doa, orrialde osoak hartzen dituzten irudiekin. Justine Brax ilustratzaileak teknika mistoak erabili ditu —akuarela, tinta eta pastela— tonu ilun eta urdinez jositako irudi atmosferikoak sortzeko. Ilustrazioek ez dute testuaren edukia zabaltzen, baina kontakizunaren giro dramatikoa indartzen dute, osotasun bisual trinkoa eskainiz.