Izenburua: Patti eta inurriak
Idazlea: Anouk Ricard
Ilustratzailea: Anouk Ricard
Itzultzailea: Bego Montorio
Argitaletxea: Astiberri
Urtea: 2021
Bilduma: Txikiberri
Orri kopurua: 48
Adina: 10tik gora
Laburpena:
Abentura komikia da, misteriozko tonua duena, eta erritmo bizia. Pattiri errieta egin diote irakasleak eta gurasoek, nota txarrak ateratzeagatik. Logelara nahigabetuta joan da, Internetera konektatu da eta, bat-batean, zerbait txundigarria gertatu zaio: bere etxeko lorategian agertu da eta inurri bat bezain txikia da. Hortik aurrera, intsektu batzuk lagun dituela eta bestetzuk etsai, mundua menderatzeko konspirazio batean murgildurik aurkituko da.
Ilustrazioak bereziak dira. Sinpleak. Aspaldikoak ematen dute. Bai irudiengatik eta baita erabiltzen diren koloreengatik ere. Kolorearen erabilera berezia da. Kolore indartsuak erabiltzen ditu, ez dira batere kolore gozoak. Agertoki bakoitzean kolore edo tonalitate bat nabarmentzen da. Asko jolasten du marrazkilariak koloreekin.
Komikiaren kodeari dagokionez ere gauza bera esan daiteke. Binetak erregularrak dira, aldatzen den bakarra tamaina da. Ez dago narratzailerik.
Pertsonaiek pentsatu edo esaten dutenaren bidez jasotzen dugu gertatutakoa. Pertsonaiak zomorroak dira, Patti izan ezik. Inurriak, makila-intsektua, arkakusoak, kakalardoak,... Gizakiak bailiran jokatzen dutenak eta zentzugabeko egoera barregarriak sortzen dituztenak. Elkarrizketak letra lotuan ematen dira, eta txartel zein oharrak letra larrian.