Izenburua: Hondartzan jolasean

Idazlea: Anita Bijsterbosch

Ilustratzailea: Anita Bijsterbosch

Itzultzailea: Amets Santxez Munain

Argitaletxea: Ttarttalo

Urtea: 2022

Orri kopurua: 32

Adina: 4tik gora

Laburpena:

Album honek aisialdiko une xumeen edertasuna goresten du. Istorio sinplea da, atsegina, udako egun dibertigarri baten kronika, irakurlearen aktibazioa eskatzen duena (putz egin dezan eskatuz, agurtuz, liburua batera edo bestera mugituz...) seguru asko irakurlearen gozamena eragiteko.

Azeria, hontza eta sagua itsasertzean jolasean ari dira, kometa hegaldarazi nahian. Mapatxea zertxobait beranduago agertuko da txalupan lagun taldera batzera. Elkarrekin eguzkiaz eta hondartzaz gozatuko dute bestelako abentura handirik gabe. Lau animalia protagonistak izango ditugu ilustrazioetan nabarmen orrialdez orrialde, baina badira paraleloan istorio guztian zehar beste bi txoritxo ere, azkenean, lagun taldearen jolasera batuko direnak.

Orrialde bikoitzetan zabaltzen diren ilustrazioek kolore biziak dituzte: eguzki eta harearen tonu hori-marroixkak, itsasoaren eta zeruaren urdin biziak, jostailuen gorri, berdeak... Gizaki itxura duten animaliek ere kolore orban biziz osaturik daude.