Izenburua: Femina Sapiens: Giza eboluzioaren historia bat emakumeen inguruan ardaztua
Ilustratzailea: Diego Rodriguez Robrero
Itzultzailea: Aiora Jaka Irizar
Argitaletxea: Ttarttalo
Urtea: 2025
Orri kopurua: 48
Adina: 10tik gora
Laburpena:
Femina Sapiens liburua zientzia‑dibulgazio ilustratuaren generoan kokatzen da; antropologia eta historiaurreko ezagutzak modu ulerterrazean azaltzen dituen lana baita. Haurrentzat eta gaztetxoentzat pentsatuta dagoen arren, helduek ere gozatzeko moduko edukia eskaintzen du. Album ilustratu formatuan aurkezten da, zientzia eta artea modu erakargarrian uztartuz.
Giza-eboluzioaren historia emakumeen ikuspegitik berridazten du. Historiaurreko emakumeen ekarpenak eta eginkizunak berreskuratzen ditu, hala nola ehizan, tresnagintzan, zaintzan, migrazioetan edo talde‑antolaketan izan zuten rola. Aldi berean, zientziaren historiako aurreiritziak eta emakumeen ikusezintasuna agerian uzten ditu, antropologiaren kontakizun tradizionalak berrikusteko beharra azpimarratuz.
Tonuari dagokionez, liburuak estilo didaktiko eta hurbila erabiltzen ditu. Diskurtsoak inklusibitatea eta ikuspegi kritiko eraikitzailea sustatzen ditu, baina beti modu positiboan. Emakumeak ez ditu bigarren mailan aurkezten, baizik eta eboluzioaren protagonista aktibo eta sortzaile gisa. Hizkera argia eta motibatzailea da, ikasgelan zein etxean irakurtzeko egokia.
Liburuaren argudio nagusia hauxe da: giza-eboluzioaren historia ez da bere osotasunean ulertzen emakumeen ekarpenak kontuan hartu gabe. Horregatik, historiaurreko bizimodua berrikusten du, emakumeek betetako eginkizunak azpimarratuz eta zientziaren kontakizunetan izan duten bazterketa historikoa azalduz. Ikerketak eta aurkikuntzak modu grafiko eta narratiboan aurkezten dira, irakurleak ikuspegi berri eta osatuago bat gara dezan.
Ilustrazioek paper garrantzitsua dute lan honetan. Diego Rodríguez Robredoren irudiak koloretsuak, zehatzak eta adierazgarriak dira, testuarekin batera informazio bisuala eskaintzen dute. Eszenak, tresnak eta pertsonaiak modu errealista baina erakargarrian irudikatzen dira. Formatu handiko orrialdeek ikusmen bidezko ikaskuntza errazten dute. Ilustrazioek zientzia eta artea uztartzen dituzte, kontakizuna biziago eta erakargarriago bihurtuz.
Imanol Merceroren kritika Berrian