Izenburua: Amestoki goxoa
Idazlea: Antton Kazabon Amigorena
Ilustratzailea: Leire Iparragirre
Argitaletxea: IKAS pedagogia zerbitzua
Urtea: 2024
Orri kopurua: 32
Adina: 6tik gora
Laburpena:
Ipuin honek doluari eta maite dugun bizidun baten heriotzari nola aurre egin aztertzen du, sei urteko Laino izeneko haurraren eta bere etxeko gereziondo maitearen arteko harremanaren bitartez.
Zuhaitzak urte osoan eskaintzen dizkion plazer txikiek —udaberriko loraldia, udako itzala, udazkeneko orbelarekin jolastea edota neguko paisaia zuria— harreman emozional sakona eraikitzen dute. Aurtengo udaberrian, ordea, gereziondoa ez da berpiztu, eta amak adierazten dio hil egin dela. Heriotzari aurre egiteko, amak bizitza luze eta emankorra izan duela gogorarazten dio, eta esker onez oroitzeko gonbidapena egiten. Lainok zuhaitza bizirik mantentzeko bere modua aurkitzen du: hura apaindu eta maite izaten jarraitzea. Leire Iparragirreren ilustrazioak —kolore biziak, hondo zuriak eta teknika mistoak erabiliz— iradokitzaileak dira eta hausnarketa bideratzen dute.
Azkenik, QR baten bidez, ipuina Unai Zubeldiak kontatuta eta musikaz lagunduta entzuteko aukera eskaintzen da.