Izenburua: Ahatetxo polita eta beste batzuk

Idazlea: Antton Kazabon Amigorena

Ilustratzailea: Jon Zabaleta

Argitaletxea: Denonartean

Urtea: 2025

Orri kopurua: 62

Adina: 8tik gora

---

Laburpena:

Ipuin bilduma da, lau kontakizun biltzen dituena. Klasiko baten berridazketa eta istorio originalak tartekatzen dira. Tamaina txikiko liburua da, tapa gogorrekoa eta edizio zaindua du. Narrazioa eta elkarrizketa tartekatzen dira. Orokorrean esaldi motz eta irakurterrazetan idatzita daude, letra tamaina eta lerroartea lehen irakurleentzat aproposa. Ilustrazioek irakurketa arintzen dute.

Istorioek seme-alabekiko maitasuna, bazterkeria, jeloskortasuna eta autoestimua bezalako gaiak erakusten dituzte, baina guztiak gai nagusi baten bueltan txirikordatzen dira: amaren maitasuna, edota maitasun eza. Maitasuna eta edertasuna goraipatzen dira, ederra izatea eta maitatua izatea zoriontsu izateko nahitaezko baldintzak balira bezala. Kontakizunek tonu hunkigarria dute, zenbaitetan ezkortasun ukituak agerian utziz.

• “Ahatetxo polita”: Andersen-en ipuinaren berridazketa da, tonu errealista eta kritikoagoarekin. Amaieran, ahatetxoak bere balioa aurkitzen du, baina bidean jasandako minak ez dira ahazten.
• “Amatxorekin”: Istorioa eguneroko une txikietan oinarritzen da, lotaratu aurreko unean zehazki, eta emozio kontrajarriak agerian uzten ditu: maitasuna, beldurra, eta baita askatasunaren beharra ere.
• “Diaboloa”: Kalean bizi den haur baten istorioa da, bere eguneroko borroka eta ametsak kontatzen dituena. Diabolo jostailua da bere ihesbidea, askatasunaren sinboloa eta baita amaren hutsunea sinbolizatzen duen elementua ere. Istorioak gizarte-bazterkeria eta haurren ahultasuna erakusten ditu, baina baita indarra eta irudimena ere.
• “Non dago Tox?”: Haurren eta animalien arteko lotura azpimarratzen du, lerro-artean helduen arteko komunikazio eza ere irakur liteke.

Liburuaren azala urdin kolore bizikoa bada ere, narrazioetan ageri diren irudiak zuri-beltzekoak dira, ia denak marko batean sartuak. Estilo sinple eta ikonikoa erakusten dute.

---

Prentsako aipamenak:

 

---