Zientzia fikzio futuristan oinarritutako komiki jolastia proposatzen digu Zalduak. Historiaren pasarte nagusi bat -Bigarren Mundu gerra- eraldatu egiten du, garaileak aldatuta -naziak aliatuen ordez jartzen ditu garaile- ondorioz letozkeenak hari narratiboaren oinarri gisara ezarriz. Kontaketaren abiapuntutzat XXI mendeko erdialdean kokatzen gaitu, mundu teknologizatu batean, zeinetan ugalketa derrigorrez mekanizatua den eta gizarte kontrola hertsia. Testuinguru honetan polizia bikote protagonistak hilketa bat ikertuko du goi mailako sekretuak azaleratu eta historia bera aldatzea eragingo duena.