Hamabost urte baino gehiago dira Galtzagorri Elkarteak Haur eta Gazte Literaturako Irakurketa Mintegia martxan jarri zuenetik. Haren barruan, urtero, tailer, hitzaldi edo ikastaro bat eskaintzen die mintegiko parte-hartzaileei eta interesa duen beste edonori.
Aurtengo ikasturterako formazio saio berri bat antolatu du Galtzagorri Elkarteak. Oraingoan, irudiei, ilustrazioei erreparatuko diegu eta albumetan duten garrantzia aztertuko dugu Teresa Durán i Armengol-en eskutik. Adituak 7 ordu eta erdiko ikastaro trinkoa eskainiko du. Duranek ilustrazioen begietatik ekarriko dizkigu albumak. Irudia jaun eta jabe den aro honetan, paradoxikoa bada ere, alfabetizazio bisualaren beharrean gaude eta antolatu dugun ikastaroak behar horri erantzun nahi dio puntako aditu baten ahotsetik.
Duranek bere saioan egingo dituen galderetako batzuk: Zerk bereizten ditu album ilustratuak eta liburu ilustratuak? Ez ote da irudiaren irakurketa, alfabetikoa bezain edo are konplexuagoa? Zein dira ilustrazioaren baliabide komunikatiboak? Albumetan zer dio testuak? Zer, irudiak? Irudia hitzetatik ezberdintzen da ala osagarria da? Halaber, Duranek irudien sekuentziazio narratiboa aztertuko du, baita orrialdeen banaketa ere; album moten analisia eta balorazioa egingo ditu baita ere. Horrekin guztiarekin, albumetako irudiak irakurtzeko estrategiak eskainiko dizkie parte-hartzaileei, albumak irakurtzeko beste baliabide eta finean beste begi batzuk.
NORENTZAT: Haur eta gazteen heziketa literarioa lantzen duten eta irakurzaletasuna sustatzeko kezka eta interesa duen edozein bitartekarirentzat: bibliotekariak, irakasleak, editoreak, kultur teknikariak, irakurketa proiektuetan parte hartzen duten begirale edo animatzaileak, literatur kritikariak…
NON: Donostiako San Telmo Museoko Ekitaldi aretoan: Zuloaga plaza, 1, 20003, Donostia.
NOIZ: Azaroaren 26an, 10:00etatik 14:30etara eta 16:30etatik 19:30etara.
IZEN-EMATEA: Izen-emate orria beteta eta diru-sarrera egin izanaren ziurtagiria bidali behar daa azaroaren 18an baino lehen administrazioa@ibbygaltzagorri.eus helbidera.
Gehienez 35 ikaslek parte har dezakete. Onarpena izen-ematearen arabera egingo da.
- Galtzagorriko mintegiko kideentzat doan.
- Galtzagorriko bazkideak: 70 euro.
- Ez-bazkideak: 100 euro.
