Vitoria-Gasteiz itzulpen sarien 2024ko deialdia eta oinarriak argitaratu ditu Gasteizko Udalak, ALHAOn.

Maiatzaren 21era arte zabalik egongo da Vitoria-Gasteiz Itzulpen Sarietan lanak aurkezteko epea. Sariok 2002an sortu ziren, Udaleko Euskara Zerbitzuaren ekimenez, eta haur eta gazte literaturari (HGL) espresuki aitortza egiten dion euskal itzulpen sari bakarra da. 

Lanak aurkezteko, eskabidea prestatu beharko da eta, horrez gain, itzulitako lanaren eta jatorrizkoaren ale bana aurkeztu beharko dira. 

Kategoria hauetan banatuko dira sariak:

• Haur literatura (6 urtetik 12ra): diploma eta 9.000 euro.
• Gazte literatura (13-18 urte): diploma eta 9.000 euro.

Honako hauek izango dira aurkezteko betebeharrak:

1. Edozein hizkuntzatatik euskarara egindako haur eta gazte literaturaren alorreko itzulpenekin, 2023. urteko legezko gordailua dutenak, lehiatu ahal izango da Vitoria-Gasteiz sarietarako.
2. Itzulpena egin eta argitaratzeko eskatzen diren lege-betekizun guztiak beteta izan beharko dituzte lehiaketara aurkezten diren lanek.
3. 2023. urtekoa izan beharko du legezko gordailuaren datak.
4. 2024ko deialdi honetara ezingo dira sail bereko lehiaketara aurkeztu 2022an edo 2023an sail horretan sarituak izan ziren itzultzaileak.
5. Sari hauek bateragarriak dira bai beste erakunde batzuek ematen dituztenekin, bai liburuak itzultzeko jasotako dirulaguntzekin.
6. Ez da onartuko enpresek egindako itzulpen-lanik.

Eskabideak aurrez aurre aurkeztu ahal izango dira Gasteizko Udalaren herritarrei laguntzeko bulegoetan, edo posta arrunt bidez helbide honetara bidaliz: Euskara Zerbitzua. Frai Zacarias Martinez kalea, 2. 01001. Vitoria-Gasteiz.

Sarituei jakinarazteaz gain, ALHAON argitaratuko da epaimahiaren erabakia, azaroaren 18a baino lehen. Udalak horretarako antolatuko duen ekitaldi ofizialaren ondoren ordainduko zaizkie sariak irabazle gertatu diren itzultzaileei.